ധനുമാസത്തിലെ പുണർതം നക്ഷത്രത്തിൽ ആറാട്ടോടുകൂടി സമാപിക്കുന്ന രീതിയിൽ രേവതി നക്ഷത്രത്തിൽ തൃക്കൊടിയേററ് നടത്തി ഏഴു ദിവസത്തെ തിരുവുത്സവം ആണ് നടത്തുന്നത്. കൊടിയേററിന് തലേന്ന് ദേശതാലപ്പൊലി 1608, 1621 എന്നീ എൻ.എസ്.എസ്. കരയോഗങ്ങൾ ഓരോ വർഷവും മാറി മാറി നടത്തുന്നു. ദേശതാലപ്പൊലി 1608എൻ.എസ്.എസ്. കരയോഗം പാട്ടത്തിൽ മഠം ദേവിക്ഷേത്രത്തിൽ നിന്നും, 1621എൻ.എസ്.എസ്. കരയോഗത്തിന്റേത് ചേന്നോത്ത് മഠത്തിൽ നിന്നും ആണ് പുറപ്പെടുന്നത്. തുടർന്ന് കളംഎഴുത്തുപാട്ട് ദേവസ്വത്തിന്റെ ചുമതലയിൽ നടത്തിവരുന്നു. കൊടിയേററ് ഉത്സവം ദേവസ്വത്തിൻ്റെ ചുമതലയിലാണ് നടത്തുന്നത്. കൊടിയേററ് ദിവസം മണികണ്ഠൻ ട്രസ്റ്റിൻ്റെ ആഭിമുഖ്യത്തിൽ ക്ഷേത്രകലകൾക്ക് പ്രാധാന്യം നല്കിയുള്ള പരിപാടികൾ നടത്തുന്നു. 1008ലധികം ക്ഷേത്രങ്ങളുടെ താന്ത്രിക അവകാശമുള്ള പുലിയുന്നൂർമനയ്ക്കൽതന്ത്രിമുഖ്യനാണ് ഉത്സവകർമ്മങ്ങൾക്ക് കാർമ്മികത്വം വഹിക്കുന്നത്. അശ്വതി, ഭരണി എന്നീ ദേവസ്വം അഹസ്സുകൾ ശ്രീധർമ്മശാസ്താ സേവാസംഘവും, പടിഞ്ഞാറെകൊട്ടാരം ഭക്തജനസമിതിയും അത്യാർഭാടപൂർവ്വം വഴിപാടായി നടത്തുന്നു. ആദികാലം മുതല്ക്കുള്ള അഹസ്സുകളായ കാർത്തിക, രോഹിണി, മകയിരം അഹസ്സുകൾ യഥാക്രമം പാട്ടത്തിൽ കുടുംബയോഗം, കട്ടിയാട്ട് കുടുംബയോഗം, മനപ്പള്ളിൽ കുടുംബയോഗം എന്നിവർ നടത്തിവരുന്നു. രോഹിണി ദിവസം ഉത്സവബലി രാവിലെ തുടങ്ങി പകൽ നാലു മണി വരെ നീളുന്നു. ഉത്സവബലി ദർശനം അതീവ ശ്രേഷ്ഠമായി കരുതുന്നു. ഉത്സവബലിദിവസം കൊട്ടാരംഭഗവതി ട്രസ്റ്റിൻ്റെ ആഭിമുഖ്യത്തിൽ ദേശതാലപ്പൊലിയും നടത്തിവരുന്നു. ഉത്സവ ദിവസങ്ങളിൽ കൊടിമരച്ചുവട്ടിൽ നിറപറകൾ ഭഗവാന് കാർത്തിക ദിവസം കൊട്ടാരം ശ്രീ ദുർഗാ ട്രസ്റ്റ്ന്റെ ആഭിമുഖ്യത്തിൽ ദേശ താലപ്പൊലിയും സമർപ്പിക്കുന്നത് അതീവ ശ്രേഷ്ഠമാണ്.

1608, 1621 എൻ.എസ്.എസ്. കരയോഗങ്ങളുടെ ആഭിമുഖ്യത്തിൽ തിരുവാതിര, ആറാട്ട് മഹോത്സവങ്ങൾ ഓരോ വർഷവും മാറിമാറി നടത്തുന്നു. ഗജവീരൻമാരുടെ അകമ്പടിയോടുകൂടിയ പകൽപ്പൂരം, തിരുവാതിര വിളക്ക് എന്നിവ തിരുവാതിര മഹോത്സവത്തിനും, പകൽപ്പൂരം, ആറാട്ട് എഴുന്നള്ളിപ്പ് എന്നിവ ആറാട്ടു മഹോത്സവത്തിനും മാറുക്കൂട്ടുന്നു. ആറാട്ട് കിഴക്കേകൊട്ടാരം ശ്രീധർമ്മ ശാസ്താ ക്ഷേത്രക്കുളത്തിൽ നടത്തി ആറാടി വരുന്ന ഭഗവാനെ നിറപറകൾ സമർപ്പിച്ചു ഭക്തർ എതിരേൽക്കുന്നു.

ആറാട്ട് ദിവസം ഭക്തർ വഴിപാടായി നടത്തുന്ന കാവടി, കുംഭകുടം, അഭിഷേകങ്ങൾ പിറേറദിവസം ഭഗവാന് സമർപ്പിക്കുകയും ചെയ്യുന്നു. അന്നേദിവസം പഴയാറ്റ് കുടുംബം പുരാതനകാലം മുതൽക്കു തന്നെ കളഭാഭിഷേകം വഴിപാടായി നടത്തിവരുന്നു.